Asli Urang Banua

      Ulun gamang jua kaya apa handak manulis nang apa handak ulun tulis, ulun ti sabanarnya urang hulu sungai nang marantau mancari ilmu gasan hari kaina, nang handak ulun pandirakan kanapa wahini kakanakan atawa nang tuha pina supan atawa kada tapi lagi mamakai bahasa banuanya saurang, talabih lagi kada hakun malastariakan budaya urang tuha bahari.

     Ulun marasa miris lagi apabila kakawanan nang marantau ka banua urang kada lagi mangakui kalunya inya urang banua kita, atawa urang banjar. Padahal bahari, lagi tumatan sakulah di banua inya rancak bamainan balugu,gilaan sungkup,baladuman,balumba di sungai sambil tatawaan.

     Rasa handak bapicik ulun talinga, supaya kada mandangar apa nang jar inya pandirakan, apa pandirannya pina pandiran urang gaul jaman wahini, wan bapadah kada tapi ingat lagi bahasa asli inya. Baucap ulun dalam hati " Umaiii nangapa lagi nang handak di wariskan gasan anak cucu kaina, mun wahini ja kaadaannya kaya ini ? ".

     Bagimitan ulun bajalan maninggalakan kawan nang kada lagi mangaku kalunya inya nintu urang banua, dalam hati ulun tatangis, kanapa kawan nang akrab tumatan sakulah, bamainan, bagayaaan sambil tatawaan, kada lagi mangaku kalunya inya urang banua ? padahal inya lahir wan ganal di banua, cuma tulak marantau narai inya tumatan tamat SMA ka banua urang, sampai-sampai inya bulik, kada bapadah lagi kalunya inya urang banua.
       Ayuha, mulai tumatan ni jua kita dangsanak ulun barataan ai, basama-sama kita malastariakan bahasa lwan budaya kita, kada gasan urang pang, tapi gasan kita wan anak cucu kita jua kaina.

       

KADA ULUN BIARKAN BUDAYA ULUN HILANG DI TAGUK BUMI, DALAS BAPANGSAR DADA TATAP ULUN BAPADAH URANG BANUA

SHARE SHARE SHARE

About Tagantar Dot Com